Dielli i Allahut shkëlqen mbi Perëndimin

Autor: Sigrid Hunke
Përktheu: Ornela Ademovi
Redaktor: Edin Q.Lohja
Shtëpia botuese: Jeta

Bota e sotme nuk përbëhet më vetëm nga Europa dhe historia e Europës nuk përbën më në vetvete historinë e botës. Popuj të tjerë, të cilët jetojnë në kontinente të tjera, janë shfaqur në skenën e aktualitetit botëror.
Duket se ka ardhur koha të flasim për një popull, i cili ka lënë gjurmë të thella në rrjedhën e ngjarjeve botërore, një popull, të cilit Perëndimi dhe bashkë me të mbarë njerëzimi i detyrohet shumë.
Ky libër ka për qëllim t’i shlyejë botës arabe një borxh të vjetër, atë të njohjes. Dhe, në këtë aspekt, ai trajton një numër shumë të madh ndikimesh të drejtpërdrejta ose jo të qytetërimit arab – megjithëse është e pamundur të citohen të gjitha, çka nuk do të thotë se i detyrohemi gjithçka! Dhe as nuk do të thotë që kemi ndërmend të shpërfillim ose minimizojmë rëndësinë e madhe të ndikimeve greke e romake, kineze, indiane apo çifute. E nuk e kemi ndër mend as të mohojmë evolucionin dhe shkëlqimin e gjenisë së popujve gjermanikë e romanë, të cilët u mbështeten në dijet e sjella nga të huajt për realizimin e vetvetes.