Personalitetet shqiptare në Kâmûs al-a’lâm

Titulli: Personalitetet shqiptare në Kâmûs al-a’lâm
Titulli i origjinalit: Ch. Samy – Bey Fraschery, Kâmûs al-a’lâm
Autorë: Sami Frashëri
Zgjodhi, përktheu dhe shpjegoi: Mehdi Polisi
Kryeredaktor: Husamedin Abazi
Redaktor gjuhësor: Elez Ismaili
Recensentë: Feti Mehdiu, Bahri Aliu
Korrektor: Liljana Meshiq – Jajaga
Dizajni: Suhejb Xhemaili
Përgaditja kompjuterike: Focus Pro – Shkup
Mbikqyrës i shtypit: Kemail Ismanili
Botues: Sh. B. Logos – A
Shtypi: Focus – Prishtinë

Pasqyrë e personaliteteve shqiptare me ndikim në të kaluarën, të përmendura në enciklopedinë Kamusu’l – A’lam të Sami Frashërit.

Sami Frashëri në Kâmûs al-a’lâm-in e tij ka dhënë shënime biografike edhe për shumë personalitete nga mbarë trojet shqiptare, nga: Elbasani, Korça, Shkodra, Tetova, Prishtina, Prizreni, Peja, Ohri, Manastiri, Shkupi, Ulqini Gjirokastra, Janina etj., shumica e të cilëve për lexuesit shqiptarë, mjerisht, kishin mbetur të panjohur sa duhet. Prandaj, e pamë të udhës që këtë lëndë ta nxjerrim, ta përkthejmë dhe kështu t’ia ofrojmë edhe lexuesit tonë, duke e përgatitur si vepër të veçantë. Përmes kësaj vepre lexuesi shqiptar do të dijë për meritat, rolin dhe aftësitë e bashkëkombësve të tij, respektivisht për shkallën e kulturës kombëtare shqiptare. Në këtë vepër lexuesi shqiptar do të lexojë për Hoxhë Tahsinin, Skenderbeun, Abdyl Frashërin, Ali Pashë Tepelenën, Bushatlinjtë, Dora d’Istrian (Elena Gjikën); përmes kësaj vepre do të dijë se sa kryeministra shqiptarë ka pasur në Perandorinë Osmane dhe kush janë ata; do të dijë se kush ka qenë p.sh. Aqif Mehmed Pashë Tetova; çfarë roli kanë luajtur Qyprilinjtë; kush ka qenë Gjiritli Mustafa Nail Pasha; sa historian i famshëm ka qenë Lutfi Pasha; do të dijë për Mirahor Iliaz beun, stërgjysh (nga nëna) i Sami Frashërit dhe themelues i qytetit të Korçës; do të lexojë për Nesibin; do të mësojë për Sinan Pashën, pushtuesin e Jemenit, i cili ka qenë pesë herë kryeministër (sadriazem) i Perandorisë dhe pesë herë kryekomandant ushtarak; për Mehmed Ali Pashën, reformator i Egjiptit, për Seid Pashën, sipas të cilit e mer emrin qyteti Port Said. Do të mësojë për një varg poetësh shqiptarë të shekullit 15-16; Fevrin, Suzin, Mesihin e Prishtinës, Jahja bej Dukagjinin, Dukagjin-zade Ahmed beun, Muidin etj.